An Creat Eorpach um Ábhar an Oideachais Dhigitigh

Tá méadú suntasach tagtha le blianta beaga anuas ar sholáthar agus éileamh ábhair dhigitigh chun críocha oideachais, go háirithe mar gheall ar phaindéim COVID-19.

Tá an méid seo a leanas i measc na n-athruithe suntasacha:

• Tá athrú mór tagtha ar nósanna i measc soláthraithe ábhair dhigitigh (an tionscal agus an earnáil phoiblí) agus i measc tomhaltóirí (múinteoirí, mic léinn agus daltaí)
• Tá ábhar oideachais dhigitigh níos tarraingtí, níos idirghníomhaí agus níos leabaithe i bhformáidí agus ardáin éagsúla
• Tá forbairtí teicneolaíochta nua, amhail an fhoghlaim mhóibíleach, an réaltacht thumthach agus an intleacht shaorga (IS / IS ghiniúnach), ag spreagadh daoine chun cineálacha nua ábhair oideachais dhigitigh a ghlacadh
• Le cleachtais nua teagaisc agus foghlama (an fhoghlaim chumaisc, an mhicreafhoghlaim, an fhoghlaim oiriúnaitheach agus phearsantaithe), éilítear nuashonruithe leanúnacha ar ábhar agus forbairt ghairmiúil leanúnach d’oideoirí

Agus na hathruithe sin á gcur san áireamh, is é is cuspóir don Chreat Eorpach um Ábhar an Oideachais Dhigitigh aghaidh a thabhairt ar na dúshláin atá ann faoi láthair a bhaineann leis an gclaochlú digiteach san oideachas.

Dúshlán an aistrithe dhigitigh

I staidéar a rinneadh i mí Mheán Fómhair 2023, rinneadh meastóireacht ar staid na himeartha maidir le hábhar an oideachais dhigitigh. Cuirtear an méid seo a leanas i láthair sa staidéar:

• anailís ar sholáthar agus ar éileamh
• togra le haghaidh sainmhíniú cothrom le dáta, a fhorbrófar ar bhonn grinntaighde agus comhairliúcháin le húsáideoirí, éascaitheoirí agus cruthaitheoirí ábhair oideachais dhigitigh
• scrogaill theicneolaíocha, dhlíthiúla agus chomhthéacsúla eile
• príomhdhúshláin maidir le creat ábhair oideachais dhigitigh a fhorbairt ar leibhéal an Aontais

Aghaidh a thabhairt ar na dúshláin sin

Ó 2022 i leith, chuir an Coimisiún Eorpach dianphróiseas idirphlé le páirtithe leasmhara i bhfeidhm. Áiríodh leis sin cruinnithe déthaobhacha agus pobal cleachtais, chun a chinntiú go mbeidh úinéireacht ag na gníomhaithe uile ar na réitigh atá beartaithe agus gur féidir iad a chur i bhfeidhm ina n-iomláine.

I mí na Samhna 2023, mhol an Chomhairle go n-oibreodh tíortha an Aontais, páirtithe leasmhara agus an Coimisiún Eorpach le chéile chun ceanglais cháilíochta a chur ar fáil agus treoirlínte a chruthú le haghaidh ábhar oideachais dhigitigh níos fearr. Is é is aidhm dó sin cabhrú le tíortha measúnú a dhéanamh ar cháilíocht, sábháilteacht, iontaofacht agus cuimsitheacht ábhar oideachais dhigitigh agus feabhas a chur orthu.

An Mheitheal um an gCreat Idir-inoibritheachta Ardoideachais

Reáchtálann an Mol um Oideachas Digiteach meitheal ina bhfuil breis agus 130 gairmí agus saineolaí chun an creat le haghaidh idir-inoibritheacht ardoideachais a fhorbairt.

Féachann an creat le comhar agus éifeachtúlacht a fheabhsú laistigh d’ollscoileanna Eorpacha trí chomhchaighdeáin agus prótacail choiteanna a bhunú maidir le malartú sonraí i gcórais teagaisc agus foghlama.

Tá sé beartaithe ag an meitheal an creat a eisiúint faoi mhí Feabhra 2025.