Bailiú trasteorann sonraí agus sprioc ar leibhéal an Aontais maidir le scileanna digiteacha daltaí

Dúshláin reatha

Tá sé riachtanach go mbeidh bunscileanna digiteacha ag gach saoránach chun páirt éifeachtach a ghlacadh i ndomhan an lae inniu atá ag éirí níos digití de réir a chéile. Tharraing paindéim COVID‑19 aird ar thábhacht bunscileanna agus ardscileanna digiteacha chun ár ngeilleagair agus ár sochaithe a choimeád ag imeacht. 

Cé go mbíonn scileanna digiteacha níos forbartha ag daoine óga san Eoraip go ginearálta ná mar a bhíonn ag an gcuid eile den daonra, tá sé léirithe sa taighde nach bhforbraíonn siad scileanna digiteacha sofaisticiúla go díreach trí ghléasanna digiteacha a úsáid agus dul i méadaíocht. 

I gcodarsnacht le bunscileanna eile, amhail léitheoireacht, matamaitic agus eolaíocht, tá an rochtain ar shonraí trasnáisiúnta maidir le leibhéal reatha scileanna digiteacha daoine óga san Aontas Eorpach teoranta. 

Tá tuilleadh sonraí ag teastáil chun tuiscint níos fearr a fháil ar na fáthanna a mbíonn difríochtaí idir na leibhéil scileanna agus chun deis a thabhairt don Aontas agus dá thíortha gníomhaíochtaí éifeachtacha a leagan amach chun dul i ngleic leis na bearnaí sin.

Cuspóirí 

Chun dul i ngleic leis na dúshláin sin, tacaíonn an Coimisiún Eorpach le sonraí inchomparáide ar scileanna digiteacha daoine óga ar fud na hEorpa a bhailiú agus le hanailís a dhéanamh orthu. 

Glacadh sprioc maidir le scileanna digiteacha ar leibhéal an Aontais sa Rún ón gComhairle 2021 maidir le creat straitéiseach le haghaidh comhar Eorpach san oideachas agus san oiliúint i dtreo an Limistéir Eorpaigh Oideachais agus níos faide anonn (2021-2030). 

Iarrtar sa Rún go laghdófaí go dtí níos lú ná 15% faoi 2030 sciar na mac léinn san ochtú grád (13-14 bliana d’aois) nach bhfuil litearthacht mhaith ríomhaireachta agus faisnéise acu.

Déantar feidhmíocht sa litearthacht ríomhaireachta agus faisnéise a thomhas trí úsáid a bhaint as sonraí ón Staidéar Idirnáisiúnta ar Litearthacht Ríomhaireachta agus Faisnéise (ICILS). 

Cuireann an bailiú sonraí trasnáisiúnta sin feabhas ar an tuiscint atá againn ar threochtaí an oideachais dhigitigh ar leibhéal an Aontais Eorpaigh agus ar leibhéal gach tír den Aontas araon. Cuidíonn sé le riaracháin phoiblí náisiúnta rianú a dhéanamh ar na leibhéil scileanna i measc daoine óga i gcaitheamh ama agus thar theorainneacha agus an bunús le forbairt beartais bunaithe ar fhianaise a neartú.

Príomhghníomhaíochtaí

• tacaíocht airgeadais a thabhairt do rannpháirtíocht thíortha an Aontais agus tríú tíortha atá comhlachaithe le clár Erasmus+ in ICILS 2023
• faireachán a dhéanamh ar an dul chun cinn i dtreo na sprice ar leibhéal an Aontais maidir le scileanna digiteacha na ndaltaí trí úsáid a bhaint as sonraí ó ICILS
• tuairisciú bliantúil ar scileanna digiteacha sa Tuarascáil Faireacháin ar an Oideachas agus an Oiliúint

Torthaí 

• Tá cumhdach sonraí inchomparáide idirnáisiúnta maidir le scileanna digiteacha ar fud an Aontais leathnaithe agus in 2023 bhí 22 thír de chuid an Aontais rannpháirteach ann, i gcomparáid le 7 dtír in 2018.
• Tá léargas níos cruinne againn ar leibhéal an Aontais ar leibhéil scileanna digiteacha na ndaltaí agus ar na tosca a mbíonn tionchar acu ar a bhforbairt: Níl ach scileanna digiteacha teoranta ag 43% de dhaltaí agus mar sin tá dúshlán suntasach roimh an Aontas a sprioc a bhaint amach.

Maoiniú

Tá an ghníomhaíocht seo á maoiniú trí chlár Erasmus+ an Aontais.