Għaliex l-edukazzjoni ekoloġika hi importanti?
L-istudenti ta’ kull età jeħtieġ li jkunu kapaċi jiżviluppaw l-għarfien, il-ħiliet u l-attitudnijiet biex jgħixu b’mod aktar sostenibbli, jibdlu x-xejriet tal-konsum u jikkontribwixxu għal futur aktar ekoloġiku. L-edukazzjoni u t-taħriġ għandhom rwol ewlieni x’jaqdu fl-appoġġ lin-nies biex jiċċaqalqu minn sensibilizzazzjoni dwar l-ambjent għal azzjoni individwali u kollettiva.
Għadd dejjem jikber ta’ inizjattivi u azzjonijiet dwar it-tibdil fil-klima, il-bijodiversità u s-sostenibbiltà qed iseħħu madwar l-Ewropa fl-edukazzjoni u t-taħriġ. Madankollu, minkejja l-progress u l-interess pubbliku li qed jikber, it-tagħlim għas-sostenibbiltà ambjentali għadu mhuwiex karatteristika sistemika tal-politika u l-prattika tal-edukazzjoni fl-UE.
X’qiegħda tagħmel l-UE?
Il-Kummissjoni Ewropea qed tindirizza dawn il-kwistjonijiet permezz ta’ firxa ta’ inizjattivi:
- il-Koalizzjoni tal-Edukazzjoni għall-Klima hi komunità dejjem tikber ta’ studenti u għalliema attivi fuq kwistjonijiet ta’ tibdil fil-klima u sostenibbiltà
- il-proposta għal Rakkomandazzjoni tal-Kunsill dwar it-tagħlim għas-sostenibbiltà ambjentali għandha l-għan li tappoġġja lill-Istati Membri fl-isforzi tagħhom u li tinkoraġġixxi aktar kooperazzjoni fil-livell tal-UE f’dan il-qasam
- il-qafas Ewropew il-ġdid ta’ kompetenza għas-sostenibbiltà jistabbilixxi l-għarfien, il-ħiliet u l-attitudnijiet li l-istudenti ta’ kull età se jkollhom bżonn għat-tranżizzjoni ekoloġika
- l-inizjattiva tar-riċerkaturi fl-Iskejjel tippermetti lir-riċerkaturi żgħażagħ jinvolvu ruħhom mal-għalliema u l-istudenti dwar it-tibdil fil-klima u l-iżvilupp sostenibbli
- il-kollaborazzjoni mal-Bank Ewropew tal-Investiment (BEI), pereżempju permezz tal-programm InvestEU, biex l-Istati Membri jkollhom aċċess għal finanzjament għal infrastruttura tal-edukazzjoni sostenibbli u l-iżvilupp ta’ ħiliet u pedagoġiji
- il-programmi Erasmus+ u tal-Korp Ewropew ta’ Solidarjetà għall-2021-2027 saru aktar ekoloġiċi u diġitali
Qafas strateġiku taż-ŻEE
Bħala parti mill-qafas strateġiku taż-Żona Ewropea tal-Edukazzjoni (2021-2030), ġew stabbiliti gruppi ta’ ħidma fis-setturi tal-edukazzjoni u t-taħriġ vokazzjonali, tal-edukazzjoni għolja u tal-iskejjel biex jaħdmu fuq l-edukazzjoni ekoloġika. Il-gruppi se jippermettu t-tagħlim reċiproku u l-iskambju tal-aħjar prattiki bejn l-Istati Membri u l-organizzazzjonijiet tal-partijiet ikkonċernati.