L-aħħar verżjoni: 15.5.2024
Ħarsa ġenerali
- SELFIE hi għodda għall-iskola biss. Ebda data personali ma tinġabar.
- It-tweġibiet kollha pprovduti permezz ta’ SELFIE huma anonimi. L-istudenti individwali, l-għalliema, il-mexxejja tal-iskejjel jew membri oħrajn tal-istaff li jwieġbu l-mistoqsijiet u d-dikjarazzjonijiet ma jistgħux jiġu identifikati personalment.
- Kull skola hi s-sid tar-rapport ta’ SELFIE tagħha, li ma jiġi xxerjat ma ħadd iżjed sakemm l-iskola ma tagħżilx li tagħmel dan.
- Ebda organizzazzjoni oħra, inkluża l-Kummissjoni Ewropea, ma tista’ ssegwi t-tweġibiet għal skola jew parteċipant individwali.
- SELFIE hi ospitata fuq server tal-Kummissjoni Ewropea li hu mmaniġġjat minnha stess, u d-data li tinġabar hi soġġetta għar-regoli dwar l-ipproċessar tad-data tal-Kummissjoni.
- Id-data anonimizzata u aggregata tista’ tintuża għal skopijiet ta’ politika u ta’ riċerka biss u qatt ma tintuża għal skopijiet kummerċjali.
Dikjarazzjoni ta’ Privatezza ta’ SELFIE
Din id-dikjarazzjoni ta’ privatezza tipprovdi informazzjoni dwar l-ipproċessar u l-protezzjoni tad-data personali tiegħek.
Operazzjoni ta’ pproċessar: Awtoriflessjoni dwar l-Apprendiment Effettiv permezz tat-Trawwim tal-Innovazzjoni permezz ta’ Teknoloġiji edukattivi
Kontrollur tad-Data: JRC.T.1
Referenza tar-rekord: DPR-EC-01019.3
2. Għaliex u kif nipproċessaw id-data tiegħek?
3. Fuq liema bażi(jiet) legali nipproċessaw id-data tiegħek?
4. Liema data personali tinġabar u hi soġġetta għal proċessar ulterjuri?
5. Għal kemm żmien tinżamm id-data personali tiegħek?
6. Kif inħarsu u nissalvagwardjaw id-data personali tiegħek?
7. Min għandu aċċess għad-data personali tiegħek u lil min tiġi żvelata?
8. X’inhuma d-drittijiet tiegħek u kif tista’ teżerċitahom?
10. Fejn tista’ ssib informazzjoni aktar iddettaljata?
1. Introduzzjoni
Il-Kummissjoni Ewropea (minn hawn ’il quddiem imsejħa “il-Kummissjoni”) hi impenjata li tipproteġi d-data personali tiegħek u li tirrispetta l-privatezza tiegħek. Il-Kummissjoni tiġbor u tipproċessa aktar id-data personali skont ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data (li jħassar ir-Regolament (KE) Nru 45/2001) 1.
Din id-dikjarazzjoni ta’ privatezza tispjega għalfejn nipproċessaw id-data personali tiegħek, il-mod kif niġbru u nittrattaw id-data personali kollha li tingħata, u kif niżguraw il-protezzjoni tagħha, kif tintuża dik l-informazzjoni, u x’inhuma d-drittijiet tiegħek b’rabta mad-data personali tiegħek. Hi tispeċifika wkoll id-dettalji ta’ kuntatt tal-Kontrollur tad-Data responsabbli li miegħu tista’ teżerċita d-drittijiet tiegħek, l-Uffiċjal tal-Protezzjoni tad-Data u l-Kontrollur Ewropew għall-Protezzjoni tad-Data.
L-informazzjoni relatata mal-operazzjoni ta’ pproċessar “Awtoriflessjoni dwar l-Apprendiment Effettiv permezz tat-Trawwim tal-Innovazzjoni permezz ta’ Teknoloġiji edukattivi” li saret mill-JRC.T.1 hi ppreżentata hawn taħt.
2. Għaliex u kif nipproċessaw id-data personali tiegħek?
Għan tal-operazzjoni ta’ pproċessar: SELFIE tappoġġja l-iżvilupp ta’ politiki dwar l-edukazzjoni ta’ kwalità, li huma previsti taħt l-Art. 165 tat-Trattat dwar il-Funzjonament tal-Unjoni Ewropea. Hi ġiet żviluppata bħala azzjoni speċifika tal-Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni dwar il-Pjan ta’ Azzjoni għall-Edukazzjoni Diġitali COM (2018) 22 finali.
SELFIE hi għodda mmirata lejn il-mexxejja tal-iskejjel, l-għalliema u l-istudenti. Din hi għodda ta’ awtoriflessjoni fejn l-utenti jirreġistraw volontarjament biex iwieġbu sensiela ta’ mistoqsijiet prinċipalment determinati minn qabel, li mbagħad jiġġeneraw awtomatikament (permezz tal-għodda SELFIE) rapport imfassal apposta li juri r-riżultati aggregati b’mod viżiv u interattiv għall-iskejjel biex jgħinuhom fl-użu ta’ teknoloġiji diġitali għat-tagħlim, l-apprendiment u l-valutazzjoni. Is-sejbiet jistgħu jgħinu lill-iskola tara fejn tinsab u, minn hemm, tibda konverżazzjoni dwar l-użu tat-teknoloġija u tiżviluppa pjan ta’ azzjoni. Imbagħad SELFIE tista’ tintuża fi stadju aktar tard biex jitkejjel il-progress u jiġi adattat il-pjan ta’ azzjoni. L-iskejjel huma kompletament responsabbli biex jiddeterminaw l-iskopijiet u l-mezzi assoċjati mal-użu tagħhom tal-għodda SELFIE.
Dawn ir-riżultati huma kompletament anonimizzati u ma jinkludu ebda informazzjoni personali bħall-ġeneru jew l-età. L-istudenti individwali, l-għalliema, il-mexxejja tal-iskejjel jew membri oħrajn tal-istaff li jwieġbu l-mistoqsijiet ta’ SELFIE ma jistgħux jiġu identifikati personalment f’dawn ir-rapporti.
SELFIE ma tkejjilx jew ma tqabbilx l-għarfien jew il-ħiliet tal-mexxejja tal-iskejjel, l-għalliema jew l-istudenti u mhix imfassla biex tivvaluta jew tqabbel l-iskejjel.
Il-Kummissjoni Ewropea (JRC T.1), bħala fornitur tal-għodda, timmaniġġja l-kontijiet tal-utenti permezz tal-pjattaforma tal-EU Login. Għal aktar informazzjoni dwar l-ipproċessar tad-data personali tiegħek relatata mal-EU Login, jekk jogħġbok ara r-rekord DIGIT DPR-EC-03187.
Barra minn hekk, il-Kummissjoni tista’ wkoll:
- tiddawnlowdja data aggregata u anonimizzata f’sistemi oħrajn tal-Kummissjoni Ewropea għall-analiżi
- tipproduċi rapporti u preżentazzjonijiet pubbliċi abbażi ta’ data aggregata u anonimizzata u l-analiżi tagħha
Il-parteċipanti individwali qatt ma jiġu identifikati f’dawn ir-rapporti u l-analiżijiet. F’ebda ħin mhuma se jiġu xxerjati jew isiru pubbliċi t-tweġibiet individwali mill-iskola, jew tiġi xxerjata kwalunkwe data aggregata li tista’ twassal biex jiġu identifikati studenti jew membri tal-istaff individwali.
B’mod partikolari, it-tweġibiet għall-mistoqsijiet ipprovduti permezz ta’ SELFIE huma anonimi. Għalhekk, studenti individwali, għalliema, mexxejja tal-iskejjel jew kwalunkwe membru ieħor tal-istaff li jwieġbu l-mistoqsijiet ma jistgħux jiġu identifikati personalment. Id-data kollha pprovduta fil-kwestjonarji ta’ SELFIE u matul il-proċessi assoċjati ta’ reġistrazzjoni se tintuża għall-fini tal-analiżi tat-tweġibiet b’mod ġenerali biex tinforma r-riċerka u l-politika u mhux għall-kummerċjalizzazzjoni.
Id-data personali tiegħek mhix se tintuża biex jittieħdu deċiżjonijiet b’mod awtomatizzat, inkluż it-tfassil ta’ profili.
3. Fuq liema bażi(jiet) legali nipproċessaw id-data personali tiegħek
Nipproċessaw id-data personali tiegħek, minħabba li inti (bħala koordinatur tal-iskola) tajt il-kunsens tiegħek għall-ipproċessar tad-data personali tiegħek għal fini speċifiku wieħed jew aktar skont l-Artikolu 5(d) tar-Regolament (UE) 2018/1725. Il-parteċipazzjoni tas-suġġetti tad-data hi volontarja.
Ma nipproċessawx kategoriji speċjali ta’ data, għalhekk l-Artikolu 10 tar-Regolament (UE) 2018/1725 ma japplikax.
4. Liema data personali tinġabar u hi soġġetta għal ipproċessar ulterjuri?
Sabiex titwettaq din l-operazzjoni ta’ pproċessar l-unità JRC.T.1 tiġbor il-kategoriji ta’ data personali li ġejjin:
- Data tal-EU Login: id tal-utent, l-indirizz tal-email, l-isem u l-kunjom (jekk preżenti fl-email).
- Għall-finijiet ta’ riċerka tiegħu stess, il-JRC jiġbor biss data anonimizzata mill-għodda, jiġifieri: is-sena tat-twelid (għall-istudenti biss); il-grupp ta’ età (għall-mexxejja tal-iskejjel u l-għalliema); it-total ta’ snin ta’ esperjenza ta’ xogħol (għall-mexxejja tal-iskejjel u l-għalliema); l-attendenza u l-utilità ta’ attivitajiet ta’ żvilupp professjonali (għall-għalliema biss); l-użu ta’ apparat għat-tagħlim (għall-għalliema biss); il-kunfidenza fl-użu tat-teknoloġija (għall-għalliema biss); il-perċentwal ta’ ħin tal-użu tat-teknoloġija diġitali (għall-għalliema biss); il-ħin tal-użu tat-teknoloġija (għall-istudenti biss).
L-għażla li “nippreferi ma ngħidx” hi dejjem disponibbli.
5. Għal kemm żmien tinżamm id-data personali tiegħek?
JRC T.1 iżomm biss id-data tal-EU login, sakemm l-individwu nnifsu jitlob it-tħassir jew iħassar il-kont hu stess (skont DPR-EC-03187).
6. Kif inħarsu u nissalvagwardjaw id-data personali tiegħek?
Id-data personali kollha f’format elettroniku (emails, dokumenti, bażijiet tad-data, lottijiet tad-data applowdjati, eċċ.) tinħażen fis-servers tal-Kummissjoni Ewropea. L-operazzjonijiet ta’ pproċessar jitwettqu kollha skont id-Deċiżjoni tal-Kummissjoni (UE, Euratom) 2017/46 tal-10 ta' Jannar 2017 dwar is-sigurtà tas-sistemi ta' komunikazzjoni u informazzjoni fil-Kummissjoni Ewropea.
Sabiex tipproteġi d-data personali tiegħek, il-Kummissjoni daħħlet fis-seħħ numru ta’ miżuri tekniċi u organizzattivi. Il-miżuri tekniċi jinkludu azzjonijiet xierqa biex jindirizzaw is-sigurtà online, ir-riskju ta’ telf tad-data, it-tibdil tad-data jew l-aċċess mhux awtorizzat, b’kunsiderazzjoni tar-riskju ppreżentat mill-ipproċessar u n-natura tad-data personali li tkun qed tiġi pproċessata. Il-miżuri organizzattivi jinkludu r-restrizzjoni tal-aċċess għad-data personali għall-persuni awtorizzati biss bi ħtieġa leġittima ta’ tagħrif għall-finijiet ta’ din l-operazzjoni ta’ pproċessar.
7. Min għandu aċċess għad-data personali tiegħek u lil min tiġi żvelata?
L-aċċess għad-data personali tiegħek hu pprovdut lill-istaff tal-Kummissjoni responsabbli għat-twettiq ta’ din l-operazzjoni ta’ proċessar u lill-istaff awtorizzat skont il-prinċipju tal-“ħtieġa ta’ tagħrif”. Dan l-istaff jirrispetta ftehimiet statutorji, u fejn meħtieġ, ftehimiet addizzjonali ta’ kunfidenzjalità.
L-informazzjoni li niġbru mhi se tingħata lil ebda parti terza, ħlief sal-punt u għall-iskop li nistgħu nkunu meħtieġa li nagħmlu dan bil-liġi.
8. X’inhuma d-drittijiet tiegħek u kif tista’ teżerċitahom?
Inti għandek drittijiet speċifiċi bħala “suġġett tad-data” skont il-Kapitolu III (l-Artikoli 14-25) tar-Regolament (UE) 2018/1725, b’mod partikolari d-dritt li taċċessa, tirrettifika jew tħassar id-data personali tiegħek u d-dritt li tillimita l-ipproċessar tad-data personali tiegħek. Meta applikabbli, għandek ukoll id-dritt li toġġezzjona għall-ipproċessar jew id-dritt għall-portabbiltà tad-data.
Inti tajt il-kunsens tiegħek li tipprovdi d-data personali tiegħek lill-JRC.T.1 għal din l-operazzjoni ta’ pproċessar. Inti tista’ tirtira l-kunsens tiegħek fi kwalunkwe ħin billi tinnotifika lill-Kontrollur tad-Data. L-irtirar mhux se jaffettwa l-legalità tal-ipproċessar imwettaq qabel ma int tkun irtirajt il-kunsens.
Inti tista’ teżerċita d-drittijiet tiegħek billi tikkuntattja lill-Kontrollur tad-Data, jew f’każ ta’ kunflitt lill-Uffiċjal tal-Protezzjoni tad-Data. Jekk ikun meħtieġ, tista’ tikkuntattja wkoll lill-Kontrollur Ewropew għall-Protezzjoni tad-Data. L-informazzjoni ta’ kuntatt tagħhom hi mogħtija fl-Intestatura 9 hawn taħt.
Jekk tixtieq teżerċita d-drittijiet tiegħek fil-kuntest ta’ operazzjoni ta’ pproċessar speċifika waħda jew aktar, fit-talba tiegħek ipprovdi d-deskrizzjoni tagħhom (jiġifieri r-referenza/i tar-rekord tagħhom kif speċifikat fl-Intestatura 10 hawn taħt).
9. Informazzjoni ta’ kuntatt
Il-Kontrollur tad-Data
Jekk tixtieq teżerċita d-drittijiet tiegħek skont ir-Regolament (UE) 2018/1725, jew jekk għandek xi kummenti, mistoqsijiet jew tħassib, jew jekk tixtieq tressaq ilment rigward il-ġbir u l-użu tad-data personali tiegħek, ikkuntattja lill-Kontrollur tad-Data, JRC.T.1, billi tibgħat email lil JRC-EAC-SELFIE-TOOL@ec.europa.eu.
L-Uffiċjal tal-Protezzjoni tad-Data tal-Kummissjoni (UPD)
Tista’ tikkuntattja lill-Uffiċjal tal-Protezzjoni tad-Data (DATA-PROTECTION-OFFICER@ec.europa.eu) dwar kwistjonijiet relatati mal-ipproċessar tad-data personali tiegħek skont ir-Regolament (UE) 2018/1725.
Il-Kontrollur Ewropew għall-Protezzjoni tad-Data (EDPS)
Għandek id-dritt tirrikorri (jiġifieri, tista’ tressaq ilment) għand il-Kontrollur Ewropew għall-Protezzjoni tad-Data (edps@edps.europa.eu) jekk jidhirlek li drittijietek skont ir-Regolament (UE) 2018/1725 inkisru b’riżultat tal-ipproċessar tad-data personali mill-Kontrollur tad-Data.
10. Fejn tista’ ssib informazzjoni aktar iddettaljata?
L-Uffiċjal tal-Protezzjoni tad-Data (UPD) tal-Kummissjoni jippubblika r-reġistru tal-operazzjonijiet ta’ pproċessar kollha tad-data personali mill-Kummissjoni, li jkunu ġew iddokumentati u nnotifikati lilu. Tista’ taċċessa r-reġistru permezz ta’ dan il-link.
Din l-operazzjoni ta’ pproċessar speċifika ġiet inkluża fir-reġistru pubbliku tal-UPD bir-Referenza tar-reġistrazzjoni li ġejja: DPR-EC-01019.3 Awtoriflessjoni dwar l-Apprendiment Effettiv permezz tat-Trawwim tal-Innovazzjoni permezz ta’ Teknoloġiji edukattivi.