Pjan ta’ Azzjoni għall-Edukazzjoni Diġitali – Azzjoni 6

Huwa importanti li nifhmu x’inhuma l-konsegwenzi tal-fatt li l-intelliġenza artifiċjali (IA) qed tkompli tevolvi u qed jinstabu użi ġodda għad-data tagħna. L-IA fl-edukazzjoni m’għadhiex idea futuristika, iżda saret realtà li qiegħda dejjem tinfirex. L-użu tal-IA biex tgħin fit-tagħlim tal-lingwi barranin huwa biss eżempju wieħed.

L-IA għandha potenzjal kbir biex ittejjeb l-edukazzjoni, iżda neħtieġu analiżi aktar fil-fond tal-implikazzjonijiet, inkluż ta’ kwalunkwe kwistjoni etika li tista’ tinqala’.

X’inhuma l-għanijiet?

Il-Kummissjoni Ewropea trid li n-nies isiru jafu aktar dwar l-użu tal-IA u tad-data fl-edukazzjoni u tiġbed l-attenzjoni għall-possibbiltà ta’ riskji, anki etiċi. Għandha l-għan li tipprovdi gwida għall-użu xieraq tal-IA fl-edukazzjoni.

X’qed tagħmel il-Kummissjoni?

Fl-2022 ippubblikajna linji gwida dwar l-użu etiku tal-IA u tad-data fit-tagħlim u fl-apprendiment. Dawn ġew żviluppati minn grupp ta’ esperti fl-edukazzjoni u fl-IA fuq il-bażi tar-rispons li ġbarna minn konsultazzjoni li għamilna.

Il-linji gwida joffru sostenn prattiku u gwida, l-aktar għall-għalliema tal-primarja u tas-sekondarja bi ftit jew ebda esperjenza fl-użu tal-IA.

Il-linji gwida għandhom l-għan li:

• jispjegaw kif l-IA tista’ tintuża fl-iskejjel
• jgħinu lill-għalliema u lill-istudenti biex jużaw l-IA fit-tagħlim u l-apprendiment tagħhom
• jiddiskutu l-kunsiderazzjonijiet etiċi li jirfdu l-linji gwida
• joffru sostenn biex jiġu żviluppati sistemi u proċessi amministrattivi

Il-linji gwida fihom ukoll sensiela ta’ mistoqsijiet dwar il-kunsiderazzjonijiet etiċi u prattiċi tal-użu tal-IA u tar-riżorsi bbażati fuq id-data u jagħtu pariri dwar kif dawn jiġu adattati għal skopijiet edukattivi differenti.

X’benefiċċji prattiċi oħrajn se jkun hemm?

• aktar għarfien dwar l-użu etiku tal-IA u tad-data fit-tagħlim u fl-apprendiment
• użu akbar tal-IA fl-edukazzjoni u fit-taħriġ

Kronoloġija

Finanzjament

Permezz ta’ Erasmus+, il-Kummissjoni tipprovdi appoġġ kontinwu għal proġetti fil-livell lokali dwar l-IA u d-data fl-edukazzjoni.