Pjan ta’ Azzjoni għall-Edukazzjoni Diġitali – Azzjoni 1

Djalogu strutturat mal-pajjiżi tal-UE

Il-promozzjoni ta’ edukazzjoni diġitali aċċessibbli, ta’ kwalità għolja u inklużiva għandha tkun sforz komuni mas-soċjetà kollha. Jeħtieġ li l-gvernijiet, l-istituzzjonijiet tal-edukazzjoni u t-taħriġ, is-settur privat u l-pubbliku, kollha kemm huma, ikunu impenjati biex jipprovdu ekosistema tal-edukazzjoni diġitali bi prestazzjoni għolja.

Għal dan l-għan, sar djalogu strutturat dwar dawn il-kwistjonijiet bejn il-Kummissjoni u l-pajjiżi tal-UE bejn l-2021 u l-2023, biex jgħin lill-Ewropa tilħaq il-miri għall-2030 fl-ambitu tal-programm ta’ politika dwar id-Deċennju Diġitali.

Id-djalogu laqqa’ lil korpi governattivi differenti u diversi partijiet ikkonċernati mis-soċjetà ċivili. Kien iggwidat minn “approċċ ta’ gvern sħiħ”, li jinvolvi kollaborazzjoni bejn il-fergħat kollha tal-gvern, inklużi:

• l-edukazzjoni u t-taħriġ
• id-diġitalizzazzjoni
• l-impjiegi u l-affarijiet soċjali
• il-finanzi u l-investiment

Għanijiet

• Il-mobilizzazzjoni tal-għodod tal-UE (fondi, programmi speċifiċi) biex jgħinu lill-pajjiżi tal-UE jagħmlu sforzi addizzjonali għar-riformi
• Kontribut għal azzjoni futura fil-livell tal-UE, b’mod partikolari inizjattivi ppjanati dwar l-edukazzjoni u l-ħiliet diġitali

Attivitajiet ewlenin

• Diskussjonijiet mal-pajjiżi tal-UE fil-grupp ta’ livell għoli ta’ koordinaturi nazzjonali għall-edukazzjoni u l-ħiliet diġitali
• Djalogi bilaterali mal-pajjiżi tal-UE
• Konsultazzjonijiet mal-partijiet ikkonċernati
• Għoti ta’ kontribut għall-programm ta’ politika tad-Deċennju Diġitali u l-pjanijiet direzzjonali nazzjonali

Riżultati

• Impenn politiku akbar mill-gvernijiet tal-UE biex jintlaħqu l-objettivi tal-UE dwar l-edukazzjoni u l-ħiliet diġitali
• Kondiviżjoni tal-esperjenza u tal-aħjar prattika
• Aktar sensibilizzazzjoni dwar il-fatturi ewlenin biex is-sistemi tal-edukazzjoni u t-taħriġ isiru aktar diġitali u jittejbu l-ħiliet diġitali

L-attivitajiet tad-djalogu strutturat irriżultaw fl-adozzjoni tal-atti li ġejjin:

• Rakkomandazzjoni tal-Kunsill dwar it-titjib tal-forniment tal-ħiliet diġitali fl-edukazzjoni u t-taħriġ
• Rakkomandazzjoni tal-Kunsill dwar il-fatturi abilitanti ewlenin għas-suċċess tal-edukazzjoni u t-taħriġ diġitali

Kronoloġija

Rakkomandazzjoni tal-Kunsill dwar il-fatturi abilitanti ewlenin għas-suċċess tal-edukazzjoni u t-taħriġ diġitali

Ir-Rakkomandazzjoni tal-Kunsill tippreżenta qafas modern ta’ investiment, governanza u bini tal-kapaċità għall-edukazzjoni u taħriġ diġitali.

Abbażi tar-riżultati tad-Djalogu Strutturat, ir-Rakkomandazzjoni tal-Kunsill tistieden lill-pajjiżi kollha tal-UE jiżguraw aċċess universali għal edukazzjoni u taħriġ diġitali ta’ kwalità għolja.

Għanijiet

Din ir-rakkomandazzjoni għandha l-għan li tippromwovi r-riformi strutturali meħtieġa fis-sistemi tal-edukazzjoni u t-taħriġ tal-pajjiżi tal-UE, abbażi ta’:

• strateġija koerenti li tindirizza b’mod speċifiku l-edukazzjoni u l-ħiliet diġitali
• titjib tal-feedback, permezz ta’ monitoraġġ u evalwazzjoni aħjar tal-politiki rilevanti u integrazzjoni aktar rapida tar-riżultati fit-tfassil tal-politika
• approċċ ta’ gvern sħiħ għall-edukazzjoni u t-taħriġ diġitali, u kooperazzjoni msaħħa fost il-partijiet ikkonċernati, inkluż mas-settur privat
• il-ħolqien u t-titjib tas-sħubijiet mal-għalliema
• l-iżgurar tal-aċċess għat-taħriġ diġitali għall-għalliema, l-edukaturi, u l-persunal kollha
• appoġġ għall-ħolqien tal-kapaċità diġitali fl-istituzzjonijiet kollha tal-edukazzjoni u t-taħriġ

Finanzjament

Din l-azzjoni kisbet finanzjament permezz tal-programm Erasmus+, il-Fond Soċjali Ewropew Plus, il-Fond għal Tranżizzjoni Ġusta, il-Fond Ewropew għall-Iżvilupp Reġjonali, il-Programm Ewropa Diġitali, l-Orizzont Ewropa.